جاست ريج شرب للأطفال و الرضع

الموضوع دة مخصوص عن جاست ريج شرب ، و خصوصا للإمهات ، لأنهم هما اللى بيعتنوا بالأطفال و الرضع ، و هما اللى بيعانوا معاهم ، عشان كدة هأحاول فى الموضوع دة نقدم معلومات مفيدة عن جاست ريج شرب ، عشان كل أم تتطمن قبل ما تدى ابنها أو بنتها الدوا دة .

جاست ريج شراب للإمساك في الرضع

أشهر إستعمالات هذا الدواء هو علاج الإمساك في الرضع و حديثى الولادة ، و الإمساك حالة شائعة في الرضع و خصوصاً اللى بيرضعوا لبن صناعى .

يجب عدم اللجوء إلى استعمال جاست ريج كحل أولى لعلاج الإمساك في الرضع ، و يجب أولا التأكد من عدم وجود إنتفاخات ، لأن الغازات تؤخر عملية الإخراج ، و أحيانا بعلاج العازات إما بمساعدة الطفل على إخراج الغازات بالتدليك أو بإعطاءة أعشاب أو ادوية لعلاج الغازات ، تحل المشكلة .

يجب عليكى أن لا تستخدمى شراب جاست ريج لطفلك إلا من خلال وصفة طبية ، و لازم تلتزمى بتعليمات الجرعة و المدة اللى وصفها لك الدكتور بتاع الأطفال .

جاست ريج للترجيع

ساعات الرضع بيعانوا من ترجيع مستمر ، و الدكاترة في الحالة دى في العادة بيغيروا لهم اللبن ( لنوع لبن مخصص للأطفال اللى بترجع ) ، و بيدوا معاة أدوية زى موتيليم أو جاست ريج شرب لفترة معينة .

فعادى جدا أن دكتور طفلك يكتب لة جاست ريج مع ادوية تانية لو كان بيرجع .

الجرعة بتتحدد بشكل فردى ، يعنى كل حالة لها جرعتها ، و  لازم تلتزمى بالجرعة و المدة اللى حددها لكى الدكتور.

جاست ريج مش مضاد حيوى!

شراب جاست ريج بيجى في إزازة لونها بنى غامق ، و جواها بودرة ، و بيتحضر بإضافة ماء مقطر ( الماء بتاع المضاد الحيوى ) لحد ما توصل المية لحد العلامة اللى موجودة على الأزازة .( خط أو حز موجود على الأزازة ) .

لو مش عارفة كمية المية اللى المفروض تحطيها على البودة عشان تحضرى الدوا ، ممكن تخلى الصيدلى أو اللى شغال في الصيدلية يحضروة ليكى .

أهم حاجة لازم تعرفيها عن شراب جاست ريج ، إنة مش عشان بودة و بتتحلل بالمية يبقى مضاد حيوى ، و بالتالى مش لازم تخلصى الإزازة ، اللى لازم تعملية هو الإلتزام بتعليمات الجرعة و المدة اللى حددها لك الدكتور بتاع إبنك أو بنتك .

لازم ترجى الإزازة كويس قبل ما تدى طفلك الجرعة .

أحسن حاجة لقياس الجرعة هو المعيار البلاستيك اللى بيجى مع ازازة الدوا ، بس لو طفلك مش هيعرف يبلع لو استخدمتى المعيار ، يبقى تأخدى الجرعة بالمعيار و بعد كدة تسحبيها بالسرنجة و تنقطيها لطفلك في بقة .

يبقى رجى الإزازة الأول ، عايرى الجرعة ( بالمعيار أو السرنجة ) ، أدى طفلك الجرعة .

صلاحية الدوا بعد ما يتحل بالمية 14 يوم بالكتير ، و لازم بعد كدة ترمية .

جاست ريج شراب بكام ؟

سعر الأزازة بــ 13.5 جنية ، و عبوتين مياة للتحليل بــ 2 جنية ، يبقى كلة تقريباً 16 جنية .( خلى بالكوا السعر دة ممكن يتغير مع الوقت  ، السعر دة في يوم ‏الأربعاء‏، 31‏ يناير ‏، 2018 ) .

بدايل جاست ريج شراب

لو الدكتور كتب لك جاست ريج شرب لطفلك ، وما لاقيتهوش ، مش لازم تتعبى نفسك أوى في التدوير ، ممكن تسألى الصيدلى عن البديل المناسب ، و على أي حال الأصناف دى تعتبر بدايل 100 % لشراب جاست ريج ، خديها لابنك او بنتك و إنت مطمنة ، و بردوا ما فيش مانع تتصلى بالدكتور بتاع طفلك عشان تتأكدى

  • جى ريجولاتور 24 مجم / 5 مل 125 مل شراب معلق G – Regulator 24mg/5ml 125 ml susp .
  • ترايتون 480 مجم / 100 مل 125 مل شراب معلق Tritone 480 mg / 100 ml 125 susp .

أنا برضع و الدكتور كتب لى جاست ريج أقراص

لو انتى بترضعى ابنك طبيعى ، و كان عندك حالة خلت الدكتور يكتب لك أنت جاست ريج أقراص ( مثلا قولون عصبى ، امساك ، مشكلة في المرارة ) ، فعادى الأقراص بتاعة جاست ريج مش هتأثر على اللبن و لا على طفلك اللى بيرضع منك ، و ممكن تاخديها عادى و أنت بترضعى و ما تقلقيش .

جرعة  جاست ريج

الجرعات دى ارشادية بس ، و لازم تلتزمى بالجرعة و المدة اللى حددها الدكتور لابنك او بنتك ، و لو في تعارض بين المكتوب في الموضوع دة و بين كلام دكتورك ، امشى على كلام دكتورك .

  • من الولادة حتى 6 أشهر : 5 مل ، 2-3 مرات في اليوم الواحد.
  • من 6 أشهر إلى 1 سنة: 5 مل ، مرتين في اليوم.
  • من 1 إلى 5 سنوات: 5 مل، 3 مرات في اليوم الواحد.
  • أكثر من 5 سنوات: 10 مل ، 3 مرات في اليوم.

جاست ريج لة اعراض جانبية

اى دوا  لة  اعراض جانبية ، بس جاست ريج لو التزمتى بالجرعات و المدة ، ما يقلقش ، و تقريباً مش هيسبب أي اعراض جانبية لطفلك .

النشرة اللى مع علبة جاست ريج شراب

لو عايزة تقرى النشرة اللى جاية مع علبة الدوا ، الصورة اللى موجودة ممكن تكبيرها ( تسحبى ) و تقرى براحتك .

 

جاست ريج نشرة معلومات المريض
جاست ريج نشرة معلومات المريض

 

أضف تعليقك

لن يتم نشر عنوان بريدك الإلكتروني.