للمصريين بس : برشام أوليبتينا OLIPTINA

الدوا دة اسمة ( أوليبتينا ، و بتتنطق كأنها 3 كلمات : أوة – ليب – تينا ، بس تخطفها بعد ما تشبك الكلمات فى بعض ، فيبقى : أوليبتينا ) .

تنوية : المقال مكتوب بالعامية المصرية ، للمصريين فقط …لو حابب تقرأ مقال باللغة العربية الفصحى عن أوليبتينا OLIPTINA، إضغط على الرابط هنا .

أوليبتينا .. دة بيعمل إية بقى؟

اوليبتينا بيظبط السكر ، بس لازم عيان السكر يلتزم مع الدوا بردوا ، بنظام فى الأكل ( يعنى ما تاكلش براحتك و تقول الدوا هيظبط لى السكر ) ، و لازم بردوا شوية رياضة ( يعنى مثلا تمشى لك كل يوم نص ساعة ) …لو عملت كدة يبقى دوا ( أوليبتينا OLIPTINA) فعلاً هيظبط لك السكر بتاعك ، إنما حضرتك تاكل مثلا 8 ترغفة فى اليوم ، و تقعد ادام التليفزيون و تقول الدوا هيظب السكر …لاء إنسى .

ممكن الدكتور بتاعك يكتب لك دوا ( أوليبتينا OLIPTINA) دا ، مع ادوية تانية للسكر بردوا ، ففمكن ينكتب أوليبتينا مع مثلا دياميكرون أو مع دوانيل أو مع سيدوفاج أو جلوفاج أو اماريل …دة عادى الدكتور بيعمل كدة لأنة شاف إن سكرك مش هنظبط إلا بصنفين دوا ، و مش هينفع معاك صنف دوا واحد .

أوليبتينا : إرجوك محتاجة الجرعة

الجرعة بتاعتك بيحددها لك الدكتور بتاعك ، و لازم تلتزم بيها كويس ، و الجرعة دى ممكن الدكتور يزودا أو يقللها بعدين ، بحسب إستجابتك للعلاج ، و إنتظامك فى الاكل .

فى العادى ، جرعة ( أوليبتينا OLIPTINA) ، بتكون مرة واحدة فى اليوم ، بس فى حالات ممكن تاخد الدوا دة مرتين فى اليوم .

الدوا دة ما ينفعش يأخدة عيال صغيرة ( اقل من 18 سنة ) .

على فكرة اوليبتينا دة فى منة تلت انواع : 6.25 و 12.5 و 25  .

الأعراض الجانبية : أوليبتينا بيجيب صداع و بيوجع البطن

أوليبتينا OLIPTINAممكن يعمل لك صداع و دوخة ، و تحس ان بطنك مش مرتاحة ( إمساك أو اسهال أو مغص أو إنتفاخ ) .

طبعا لو خدت جرعة عالية ، ممكن يوطى سكرك ، و يغمى عليك ، و ندخل فى قضية …فبلاش تزود الجرعة ، و لو عملت دايت عرف الدكتور بتاعك عشان يعدل لك الجرعة ، و لو إشتغلت شغلانة فيها حركة و أكشن و كدة ..عرف دكتورك عشان ممكن يظبط لك الجرعة ، و لو حصل و زعلت زعل جامد ، و ناوى تطول فى الزعل عرف الدكتور ..عشان يظبط لك السكر ( الزعل وحش بيبهدل عيان السكر ..مش مستاهلة يا أسطى روق ) .

لو حامل او بترضعى ما تأخدش أوليبتينا

لو كنتى حامل أو بترضعى ما تاخديش الدوا دة ، اصلا الستات اللى عندها سكر لما بتحمل او بترضع الدكاترة بيمشوهم على الانسولين و دة أمان ما فيهوش مشكلة ، إنما حبوب السكر مش تمام للحامل و لا للست اللى بترضع .

نصايح مهمة لعيان السكر اللى بيأخد أوليبتينا

لازم يا أسطى تغير حياتك ، مش هينفع و ربنا تكمل كدة ..لازم تبطل اكل محشى ..و رز ، و إعرف إن اخرك فى اليوم نص رغيف ..بص ….. شوف الدكتور بتاعك قال لك إية فى الأكل و اظبط  .

لازم يا حاجة تتمشى شوية و تخسى شوية ، عشان السكر ينظبط .

السكر نفسة مش خطر ، الخطر هو الحاجات اللى ممكن يجبها السكر ، مثلا مع الوقت ( الوقت دة سنين ) ، السكر ممكن يجيب عمى ، او مشاكل فى الكلى ، و طبعا السكر بيأثر على موضوع السكس ( عارف إن موضوع السكس مهم بالنسبة لك !!!) ..عشان كل الحاجات دى ما تحصلش أو تحصل متأخر ..حافظ على السكر بتاعك مظبوط و خف اكل شوية ،  وقوم إتمشى .

خد الدوا ، زى ما الدكتور قال لك بالظبط ، و بلاش تشغل دماغك اللة يبارك لك .

لازم تفضل تأخد الدوا ( أوليبتينا OLIPTINA) ، حتى لو كنت حاسس إن سكرك كويس أو إنك حلو و سليم  …..بلاش يا مسكر توقف الدوا ، لإنها ممكن تقلب غم .

ما توقفش الدوا خالص ، إلا لو الدكتور بتاعك قال لك : وقف ، غير كدة تفضل ماشى على الجرعة اللى قال لك عليها الدكتور بتاعك أحسن لك …صدقنى .

لو نسيت الجرعة بتاعت أوليبتينا OLIPTINA، خدها اول ما تفتكرها لو كنت فى نفس اليوم ، لكن لو عدى اليوم ، خلاص بلاش تأخد ، و خد الجرعة بتاعتك العادية فى معادها . و بلاش تشغل دماغك ، و تقول هأخد حبتين عشان اعوض …لاء يا إستاذ اللة يكرمك …الجرعة مرة واحدة فى اليوم .

oliptina tablet
oliptina tablet

بدايل أوليبتينا

الجدول الجاى دة فى البدايل و الأسعار ، و بلاش بقى جهل ، و تخش الصيدلية و ترفع صوتك ( مش عايز بديل و الجو دة ) ، إفهم الاول و بعدين إتكلم .

المهم الجدول الجاى دة فيها البدايل و التركيزات بتاعة دوا ( أوليبتينا OLIPTINA) ، و الأسعار طبعا ( مروقك… و ربنا ) .

NAME Ar-name Price in L.E. COMPANY
OLIPTINA 6.25 MG TABLET أوليبتينا 6.25 مجم أقراص العبوة 30 قرص بـــ 63 جنية مصرى راميدا للصناعات الدوائية
OLIPTINA 25 MG TABLET أوليبتينا 25 مجم اقراص العبوة 30 قرص بـــ 153 جنية مصرى راميدا للصناعات الدوائية
OLIPTINA 12.5 MG TABLET أوليبتينا 12.5 مجم أقراص العبوة 30 قرص بــ 93 جنية مصرى راميد للصناعات الدوائية
INHIGLIP 25 MGTABLET إنهيجليب 25 مجم أقراص العبوة 30 قرص بـــ 153 جنية مصرى الحكمة للصناعات الدوائية
INHIGLIP 12.5 MG TABLET إنهيجليب 12.5 مجم أقراص العبوة 30 قرص بــ 93 جنية مصرى الحكمة للصناعات الدوائية
VIPIDIA 12.5 MG TABLET فيبيديا 12.5 مجم اقراص غير معروف الحكمة للصناعات الدوائية
VIPIDIA 25 MG TABLET فيبيديا 25 مجم اقراص غير معروف الحكمة للصناعات الدوائية

هل تعلم؟

هل تعلم أن: هناك نوع خاص من الالتهاب المهبلى يحدث نتيجة العدوى بالفطريات , وهذا النوع يحدث بصفة خاصة لدى مريضات البول السكرى , ولدى الحوامل , وتنتج عنه إفرازات بيضاء سميكة مصحوبة بهرش شديد وحرقان أثناء الجماع , وسبب الاصابة هنا يرجع الى نوع من الفطريات هو فطر المونيليا الذى يكثر أثناء الحمل .للمزيد من المعلومات عن أسباب الإفرازات المهبلية كريهة الرائحة من الرابط هنا.

هل تعلم أنة يتم تحديد الولادة بعملية قيصرية إذا احتاج الأمر قبل الميعاد المتوقع للولادة بأسبوعين إذا كانت الأم تعانى من بعض الأمراض مثل : مرض البول السكرى أو ارتفاع فى ضغط الدم .للمزيد من الأسئلة الشائعة عن الولادة القيصرية إقرأ مقال (16 سؤال شائع عن الولادة القيصرية) من الرابط هنا.

هل تعلم أنة بعد الولادة قد تحدث بعض التغيرات فى مستوى السكر فى الدم حيث ينخفض عن معدله أثناء الحمل , ويكون ذلك ملحوظا فى اليوم الثانى والثالث بعد الولادة , وبالتالى يتم نخفيض جرعة الأنسولين التى تعطى للأم التى لديها مرض البول السكرى بعد الولادة .من الرابط هنا يمكنك التعرف على المزيد من المعلومات عن رعاية الأم فى مرحلة النفاس( مرحلة ما بعد الولادة).

هل تعلم أن مرض البول السكرى هو احد الامراض الشائعة التى تتسبب فى تساقط الشعر و الرموش، من الرابط هنا يمكنك التعرف على المزيد من المعلومات عن مشاكل الشعر و الرموش و الحواجب .

موضوعات ذات صلة

حقوق الملكية الفكرية

حقوق الطبع و النسخ فيما يتعلق بمحتوى هذا المقال تعود لـــ © فارماتوب 2019. و لا يجوز نسخ هذه المادة بدون إذن . للحصول على الإذن لنسخ المحتويات، يرجى الإتصال بنا من خلال نموذج التواصل من هنا أو عبر الواتس آب على الرقم 00201061282386.